Для вас, Бацькі!
Згодна з артыкулам 90 Кодэкса Рэспублікі Беларусь аб адукацыі “Мова навучання і выхавання. Вывучэнне моў ва ўстановах адукацыі” бацькі выхаванцаў маюць права выбару мовы навучання”, якое забяспечваецца развіццём сеткі ўстаноў адукацыі з беларускай і рускай мовамі навучання і выхавання.
Таксама ў пункце 58 Палажэння Міністэрства адукацыі Рэспублікі Беларусь ад 25.07.2011 “Аб зацвярджэнні Палажэння аб установе дашкольнай адукацыі і прызнанні страціўшымі моц некаторых нарматыўных дакументаў Міністэрства адукацыі Рэспублікі Беларусь” адзначаецца, што навучанне і выхаванне ва ўстанове дашкольнай адукацыі ажыццяўляецца на беларускай і (або) рускай мовах.
Асноўная мова навучання і выхавання ва ўстанове дашкольнай адукацыі (беларуская або руская) вызначаецца яе заснавальнікам з улікам пажадання законных прадстаўнікоў выхаванцаў. Дадзеныя аб мове навучання і выхавання адзначаюцца ў Статуце ўстановы дашкольнай адукацыі (артыкул 22 Палажэння).
На тэрыторыі Шклоўскага раёна існуе 21 установа дашкольнай адукацыі. З іх 10 устаноў дашкольнай адукацыі з асноўнай беларускай мовай навучання і выхавання. Гэта дзяржаўныя ўстановы адукацыі “Дзіцячы сад № 10 аг. Гавяды Шклоўскага раёна”, “Дзіцячы сад № 11 аг. Малыя Славені Шклоўскага раёна”, “Дзіцячы сад № 13 аг. Гарадзішча Шклоўскага раёна”, “Заходскі вучэбна - педагагічны комплекс дзіцячы сад - сярэдняя школа Шклоўскага раёна”, “Старасельскі вучэбна - педагагічны комплекс дзіцячы сад - сярэдняя школа Шклоўскага раёна”, “Чарнаручскі вучэбна - педагагічны комплекс дзіцячы сад - сярэдняя школа Шклоўскага раёна”, “Акунёўскі вучэбна - педагагічны комплекс дзіцячы сад - пачатковая школа Шклоўскага раёна”, “Ардацкі вучэбна - педагагічны комплекс дзіцячы сад - базавая школа Шклоўскага раёна”, “Уланаўскі вучэбна - педагагічны комплекс дзіцячы сад - базавая школа Шклоўскага раёна”, “Фашчаўскі вучэбна - педагагічны комплекс дзіцячы сад - сярэдняя школа Шклоўскага раёна”. Падрабязную інфармацыю аб установах адукацыі Шклоўскага раёна можна атрымаць на сайтах дадзеных устаноў адукацыі. На падставе пісьма Міністэрства адукацыі Рэспублікі Беларусь ад 23.02.2018 №02-02-18/1672/дс “Аб пашырэнні магчымасцяў атрымання адукацыі на беларускай мове ва ўстановах дашкольнай адукацыі” ў рэгістрацыйна-кантрольную форму (адміністрацыйная працэдура 6.6.) унесены рэквізіты, неабходныя для забеспячэння ўліку заяў бацькоў (законных прадстаўнікоў) непаўналетніх на выбар мовы навучання ва ўстанове дашкольнай адукацыі.
